Saturday, April 16

ان نختلط او لا نختلط هذا هو السؤال !

الاختلاط وما ادراك من الاختلاط 

طبعا بعد الهبل الي جاي من السعودية ومسأل الاختلاط وان النسوان يشتغلوا في مكاتب مفصولة عن الرجال ويدرسوا في الجامعات في فروع خاصة بالبنات وان عدم السماح لهم بسواقة السيارة هو لمنع الاختلاط .. طبيعي الهبل هذا ينزل عندنا اليمن . 

اليمن مجتمع محافظ.... عبارة فضفاضة جدا! انا اقول اليمن مجتمع متنوع فيه من كل شي  فالنسبة الى الاختلاط اكيد في ناس ضده وباتقول حرام مدري لايجوز والكلام هذا .. بس كمان في ناس معه . لكن لما يجي المسيو صالح الي يفهم في الويسكي اكثر من اي شي ثاني في الحياة يتكلم على الاختلاط اكيد الواحد بايحس في مشكلة 
 تعليق صالح كان متعلق بالاختلاط ودعا احزاب المعارضة الى منع الاختلاط  ثلاث مرات ! يعني الراجل محموق ودمه بيغلي من المنكر الي شايفة على قولته في شارع الجامعة ... هي ساحة الجامعة يا اهبل! 
الان سماحة المفتي ايه الله علي صالحي  قال ان الاختلاط لا يجوز شرعاً ... باعتبار ان موضوعنا الان هو الاختلاط مش الثورة وكمان من متى وبتعرف الشرع ؟؟؟ 

بغض النظر عن كمية الهبل والحبوب المهلوسة المخلوطة بويسكي الي بانت في الفيديو الي تلفزيون اليمن استحى بعدين يرجع يعرضة  بغض النظر عن هذا لازم نعترف ان معانا كم عقدة على كم مشكلة مع الاختلاط .. 

انا عن نفسي  من بداية الثورة قرفانة من مسأة الفصل الجنسي في الساحات.. تلاقي الرجال في الساحات وفي زووة سودا تشوف تجمع النساء .. ايش الهبل هذا؟؟ 
هذا كوم والخيام كوم ثاني ..  على اساس في خيام للقبائل وللكليات والتوجهات السياسية و و و ..  وفي خيمة للنساء.. باعتبار ان المرأة  ايش؟؟ هل هي مش جزء من القبيلة؟ ولا مش جزء من هيئات تدريس الكليات ؟؟ ولا مالهاش توجه سياسي بحيث تجلس في خيمة تتناقش مع ناس من نفس فكرها

الان انا افكر لو كنت أمرأة متدينة او اسلامية ف ايش بعمل في الساحة؟ اروح خيمة الاسلاميين ولا اروح عند النساء؟ اعتقد باروح عند النساء لان غير كذا ما ينفع 
طب لو انا يسارية؟ ماااقدرش اروح لخيمة اليساريين؟ 
يعني ان النساء في الساحة لازم يجلسوا في خيمة النساء حتى لو كانوا مختلفين فكرياّ! هذا بحد ذاته هبل اكبر من الهبل الي قاله صالح 

قبل يومين اختي كتبت في مدونتها انا طلعت في مسيرة رجالية.. انا جالي انهيار عصبي ... ليش مين الحمار الي قال لازم المسيرات تتقسم؟؟ مسيرة حريمي .. مسيرة رجالي
تقريبا نفس الموقف واجهني هنا في المانيا في وقفة احتجاجية عملناها تضامناً مع اهلنا في اليمن .. المهم انا رحت واذا بي افاجئ ان حتى واحنا في قلب اوروبا لسه العقلية حقنا ما تطورت.. لقيت الرجال واقفين في جهه والنساء في جهه مع العلم ان اغلب النساء جايين مع ازواجهم الي واقفين في الجهه الثانية ... انا عن نفسي رحت وقفت بين مجموعة من الاصدقاء (شباب) لغاية ما اجى واحد معتوه يقلي روحي عند النسوان! قلتله ليش؟ قالي روحي روحي مرتي هناك.. طب وانا مال امي من مرتك انا جاية مظاهرة مش جاية اطق حنك ولا اعملي جلسة مع النسوان ...  المهم هو في النهاية بعد من عندنا وهذا يثبت نظريتي القائلة انه لو تيست بمافيه الكفاية الي قدامك بايمل ويمشي 

اتمنى الثورة ما تكون بس ضد الفساد والظلم  وتكون ثورة تجديد فعلية للفكر الاجتماعي في اليمن .. عشان لا نضطر نسمع واحد يتفلسف على معتصمين ويقول هذا حرام 
لازم هذا المصطلح "الاختلاط" ينشال من قاموسنا بالمرة !!  وايش افيها لو درسوا العيال والبنات سوا في مدارس الحكومة زي ايام ثورة سبتمبر  وايش فيها لو جلسوا البنات والعيال جمب بعض في الجامعة مش كل واحد في جهه وكأننا بانوزع مونة الشهر على النسوان والرجال .. وايش فيها لو مافي شي اسمه قسم عوائل في المطاعم .. وايش فيها لو مافي غرفة انتظار للنساء في المستشفيات .. بس بليز بلييييييز خلولنا طابور النساء عند دفع الفواتير 
لو بعدنا الحواجز هذه اكيد بايصير عندنا جيل افضل مايشوفش الجنس الاخر وكأنه مخلوق فضائي ... واكيــــــــد باتقل كمية التحرشات في الشوارع .. ايوة واحنا على اساس مجتمع محافظ متدين بس في التحرش في الشوارع حدث ولا حرج! 
شي يحزن والله ! 

No comments:

Post a Comment